Frosti og Þröstur hættir í Mínus

Gítarleikarinn Frosti Logason og bassaleikarinn Þröstur Jónsson eru hættir í rokksveitinni Mínus. Í stað Þrastar hefur verið ráðinn Sigurður Oddsson, söngvari Future Future, en enginn gítarleikari verður ráðinn í stað Frosta.

„Samstarfið hjá okkur er orðið dautt einhvern veginn og það er langt síðan það varð þannig,“ segir Frosti Logason, sem er einn af stofnendum Mínuss. „Ég var sjálfur með þær hugmyndir að sigla þessu fleyi í höfn og segja þetta gott. Þröstur var sammála því en hinir ekki. Ég ber virðingu fyrir því ef þeir vilja halda áfram en ég vil ekki hjakkast í þessu lengur. Það er mjög jákvætt að það sé gerð breyting fyrir alla sem að málinu komu en að halda áfram með ástandið óbreytt hefði bara verið áframhaldandi moð.“

Ekki vinir í mörg árAðeins eru nokkrar vikur liðnar síðan fjórða hljóðversplata Mínuss, The Great Northern Whalekill, kom út og því koma tíðindin mjög á óvart. „Það var búið að taka langan tíma að gera plötuna og koma henni í framkvæmd og það hefði verið leiðinlegt að hætta án þess að klára hana með allt þetta ókláraða efni sem við áttum. Meiningin var að fylgja þessu eftir en við erum búnir að ræða þetta mál og eftir þær samræður langaði þá að halda áfram. Við skiljum í mesta bróðerni en við höfum ekki verið vinir í mörg, mörg ár. Við höngum ekkert saman og erum búnir að láta þetta ganga mikið lengur en eðlilegt er.“ Kominn yfir söknuðinnAðspurður segist Frosti ekki sakna Mínuss eftir öll þessi ár. „Við áttum mjög góðan tíma fyrir nokkrum árum en þetta er bara svo löngu búið. Maður er fyrir löngu kominn yfir þann söknuð.“ Vítamínsprauta í rassinnSöngvarinn Krummi segir að það sé bæði erfitt og skrítið að kveðja þá Frosta og Þröst en telur að spennandi hlutir séu framundan. „Það hefði verið hálfgerð synd að leggja niður bandið. Við erum nýbúnir að gefa út plötu og allt það og okkur fannst eðlilegast að halda áfram. Það var mjög mikill metnaður fyrir því,“ segir Krummi, sem býst við breytingum á stefnu sveitarinnar. „Þetta er eins og ein góð og feit vítamínsprauta í rassgatið að fá nýjan meðlim og leyfa bandinu að þróast í nýja átt.“ Útgáfa erlendis í haustNæst á dagskrá hjá Mínus er upphitun fyrir bandarísku dauðarokksveitina Cannibal Corpse á Nasa hinn 30. júní. Í haust er síðan stefnan sett á að gefa nýju plötuna út erlendis og fylgja henni þar [email protected]