Spássían yfir alla síðuna

Sumarkiljurnar, játningar útrásarvíkinga og The Wire eru meðal umfjöllunarefna í Spássíunni, nýju tímariti um bókmenntir og listir.

Nýtt menningartímarit, Spássían, kemur út á morgun. Útgefendur og ritstjórar blaðsins eru bókmenntafræðingarnir Ásta Gísladóttir og Auður Aðalsteinsdóttir. Þær segja markmið blaðsins fyrst og fremst að mæta eftirspurn eftir umræðu um bókmenntir en einnig verður fjallað um aðrar listgreinar.

Auður og Ásta hafa áður gert útvarpsþætti um bókmenntir á Rás 1. „Þar lékum við okkur aðeins að forminu, brutum umfjöllunina upp með tónlist og fleiru og og brugðum upp ýmsum sjónarhornum," segir Ásta. „Okkur langaði til að gera eitthvað svipað í tímaritsformi og höfum gengið með þessa hugmynd í maganum árum saman. Það má svo segja að hún hafi fæðst fyrir tveimur mánuðum, þegar við ákváðum að gefa út tímarit með menningarlegum áherslum fyrir sumarið."

Efnistökin eru fjölbreytt. Í fyrsta tímaritinu er meðal annars fjallað um sumarmenninguna: bækur, tónlist, leiklist og kvikmyndir. Játningar útrásarvíkinga eru settar í bókmenntalegt og trúarlegt samhengi, fjallað er um sjónvarpsþáttinn The Wire og framtíð karlmennskunnar.

„Við lögðum upp með að gefa út rit með almennri umfjöllun um menningu í bland við fræðilega," segir Ásta, „við vildum ekki ryðjast inn á svið rita á borð við TMM, heldur hafa þetta aðeins óformlegra." Af því dregur Spássían einmitt heiti sitt; á spássíum bóka hefur óformleg umræða og listsköpun farið fram í aldaraðir. Auður og Ásta skrifa megnið af efni fyrsta tölublaðsins en aðrir pennar koma líka við sögu.

Spássían verður fáanleg í öllum helstu bókaverslunum. Stefnt er að því að ritið komi út ársfjórðungslega og vonast Auður og Ásta til að koma út tveimur tölublöðum í viðbót á þessu ári, öðru í haust og því þriðja fyrir jól.

[email protected]