Herbert Guðmunds: Pekingönd ómissandi á aðfangadagskvöld

„Ég byrjaði að skreyta húsið um mánaðarmótin. Ég setti upp temmilega mikið af jólaljósum en þau eru skemmtileg þar sem þau birta allt upp í skammdeginu og gefa manni yl og birtu í hjartað," segir Herbert Guðmundsson tónlistarmaður aðspurður út í jólaundirbúninginn hjá honum í ár.

„Í desember fer ég fljótlega að versla í matinn en þar er efst á lista pekingöndin sem er alltaf borðuð á mínu heimili á aðfangadagskvöld - fyllt að hætti popparans. Fyllingin er algjört sælgæti," segir Herbert.

„Á annan í jólum er hangikjöt og þá helst kofareykt úr sveitinni ef hægt er. Það er oftast hægt vegna góðra sambanda síðan ég var í bóksölunni og hitti bændur landsins stóran hluta ársins á söluferðum um landið."

„Síðan er það jólasúpan ómissandi sem er gömul ættarhefð sem ég lærði af móður minn en hún kallast „jólabrúnsúpan hennar mömmu". Ég fjárfesti í góðum nautabeinum sem soðin eru upp í svona þrjá til fjóra daga til að fá alvöru kraft í súpuna. Ég sýð upp í henni í síðasta skipti á þorláksmessu."

„Þá er hangikjötið soðið líka til að fá jólalykt í húsið en hún kemur með suðu hangikjötsins og uppsetningu jólatrésins sem er náttúrulega lifandi tré."

„Það sem kemur mér í jólaskapið er þegar klukkurnar hringja inn jólin klukkan sex á aðfangadag, messan byrjar í útvarpinu og þegar ég heyri prestinn lesa jólaguðspjallið: Lúkas:2:1. Þá detta jólin inn í orðsins fylgstu merkingu."

„Og svo náttúrulega að sjá allar jólaskreytingarnar út um borg og bý og ég tala nú ekki um ef hann byrjar að snjóa á afangadagskvöld svona upp úr klukkan fjögur, hálf fimm."

Ógleymanleg jólaminning Herberts

„Þegar ég var svona fimm eða sex ára og bjó inní Laugarnesi í gamla húsinu á hólnum þar sem Sigurður Ólafsson söngvari bjó líka ásamt fjöldskyldu og faðir minn kom heim með epli sem voru kölluð „delisíus" en það stóð „delux" á kassanum."

„Hann vann hjá Johnson og Kaaber í útkeyrslu og kom heim með heilan kassa af eplum. Þá sáust epli bara í búðum rétt fyrir jól og lyktin af þeim, vá það var sko jólailmurinn ógurlegi og ég fékk í jólagjöf lítinn traktor, gráan Massey Ferguson."

„Ég lék mér að honum öll jólin. Ógleymanlegt," úskýrir Herbert og segir að lokum: „Ég óska landsmönnum öllum gleðilegra jóla, hamingju og friðar á komandi ári."[email protected]