Rokkprófið - Aðalbjörn í Sólstöfum vs. Regína Ósk

SPURNINGAR

1. Hefurðu aflýst tónleikum vegna eymsla í hálsi?

2. Hljómsveitarrútan bilar á ferð um mið-Evrópu. Hvað gerir þú?

3. Hvenær varstu síðast handtekinn?

4. Áttu óskilgetin afkvæmi í fleiri en fimm sýslum á Íslandi?

5. Ertu með nafn fyrrverandi elskhuga húðflúrað á þig?

6. Allir eiga leðurjakka, en átt þú leðurbuxur?

7. Ertu með númerið hjá Helga Björns í símanum þínum?

8. Myndirðu semja lag fyrir ímyndarauglýsingu NATÓ gegn ríflegri greiðslu?

9. Í kvikmynd um líf þitt, hvaða leikstjóri væri rétti maðurinn í starfið?

10. Björn Jörundur splæsir á barnum, hvað færðu þér?



SVÖR

Aðalbjörn Tryggvason, söngvari Sólstafa

1. Nei, við höfum bara aflýst tónleikum út af eldgosi. (1 stig)

2. Hljómsveitarrútan bilaði þegar við ferðuðumst um Evrópu síðast. Við lögðum ólöglega því hún varð rafmagnslaus. Löggan vakti okkur og gaf okkur þrjár mínútur til að koma okkur út úr rútunni án þess að verða handteknir. Svo yfirheyrði hún okkur hálffulla á nærbuxunum í snjókomu. (1 stig)

3. Það eru alveg tíu ár síðan ég persónulega var handtekinn. Þá vaknaði ég bara í fangaklefa á Hverfisgötunni. (1 stig)

4. Nei, ég held að ég eigi ekkert á Íslandi en það er líklegra í tveimur Evrópulöndum. (1 stig)

5. Nei, ég er svo mikill rokkari að ég er svalari en allir. Ég er ekki með þetta listform á mér sem einhverjir lúðar eru búnir að eyðileggja. (0 stig)

6. Ég á fernar leðurbuxur. (1 stig)

7. Nei, en ég er með mynd af mér og honum í símanum. Við erum báðir Ísfirðingar og vorum saman á fylleríi í Bolungarvík um síðustu páska. (1 stig)

8. Nei, ekkert pólitískt kjaftæði. (1 stig)

9. Sergio Leone myndi ná epíkinni og Þráinn Bertelsson kæmi með Dalalífs-dramatíkina og fíflalætin. (1 stig)

10. Íslenskt brennivín. (1 stig)



SVÖR

Regína Ósk Óskarsdóttir söngkona

1. Hef einu sinni þurft að aflýsa giggi fyrir langa löngu. Var 18 ára og það heyrðist ekki píp í mér! (0 stig)

2. Reyni að komast á puttanum með liðið. Show must go on! (1 stig)

3. Var tekin fyrir hraðakstur fyrir sirka sjö árum. Var að blasta „Let the Sunshine" og steig bensínið í botn! (0 stig)

4. Ekki svo ég viti. En ef svo er, endilega gefið ykkur fram, er að kaupa jólagjafir. (1 stig)

5. Hef ekki tekið eftir því nei. (0 stig)

6. Geng ekki í buxum, ég á leðurpils. (1 stig)

7. Nei. Helgi. Hringdu í mig! (0 stig)

8. Nei. (1 stig)

9. Leyfum Quentin Tarantino að spreyta sig. (1 stig)

10. G&T. (1 stig)



NIÐURSTAÐA :

AÐALBJÖRN 9 STIG

REGÍNA 6 STIG