Klára prófin og kynna svo

Nology, fyrsta breiðskífa dúósins Nolo, er komin út. Gripnum verður fylgt eftir um leið og þeir hafa lokið jólaprófunum. Fyrsta plata dúósins Nolo í fullri lengd nefnist Nology og kom nýverið út á vegum Kimi Records. Platan hefur verið fáanleg á tónlistarveitunni Gogoyoko síðustu viku og hefur fengið mjög góðar viðtökur hjá tónlistarunnendum.

„Við ætlum að reyna að kynna plötuna eins mikið og við getum. Við ætlum að spila úti um allt og selja milljón eintök,“ segir Ívar Björnsson, annar meðlima Nolo, í léttum dúr.

Auk Ívars er í Nolo Jón Lorange og eru þeir félagar úr Breiðholti og Kópavogi. Fyrsta stuttskífa þeirra, No-Lo-Fi, kom út á vegum Braks, undirfyrirtækis Kimi Records, milli jóla og nýárs árið 2009 og var hún tekin upp í svefnherbergjum piltanna. Hún hafði að geyma lágstemmt, áheyrilegt popp með elektrónískum áhrifum og fékk mikið lof gagnrýnenda. Kraumsverðlaunin féllu þeim í skaut og einnig tilnefning til hljómplötuverðlauna Norðurlanda. „Upplagið, sem var tvö hundruð og eitthvað plötur, seldist upp hjá Braki og þá talaði Baldvin [Esra Einarsson hjá Kimi Records] um að gera fulla plötu hjá Kimi,“ segir Ívar.

Upptökur á Nology tóku langan tíma. Þær hófust í febrúar og sáu Svavar Pétur Eysteinsson úr Skakkamanage og Prins Póló og Logi Höskuldsson úr Sudden Weather Change um upptökustjórn. „Við vorum alltaf að fiffa eitthvað til og lagfæra plötuna,“ segir Ívar og bætir við að það hafi verið mjög góð reynsla að vinna með Svavari Pétri og félögum. Fjórtán lög eru á Nology, þar á meðal Beautiful Way, eitt besta lagið af No-Lo-Fi.

Eins og áður segir ætla Ívar og Jón að fylgja Nology vel eftir, en samt ekki fyrr en þeir klára prófin, þó svo að einhverjir tónleikar verði á næstunni. Ívar er að læra kvikmyndafræði í Háskólanum en Jón er í Menntaskólanum í Kópavogi. „Við erum í svo miklum prófum núna en við ætlum að byrja að rúlla á fullu eftir 10. desember,“ segir hann.

[email protected]