Magni: Gömul jólalög kveikja í mér

„Jólakortin eru upphafið af undirbúningnum á okkar heimili," segir Guðmundur M. Ásgeirsson, betur þekktur sem Magni í Á móti sól, spurður út í jólaundirbúninginn.

„Það hefur skapast sú hefð að við búum þau til sjálf og það er farið að leggja höfuðið í bleyti strax þegar fer að hausta."

„Konan mín er svo fyrirhyggjusöm að það er búið að kaupa flestar gjafir í byrjun nóvember og þar af leiðandi ekkert til að stressa sig yfir."

„Aðventan fer síðan bara í að skreyta og setja upp seríur í rólegheitum."

„Ég myndi segja að við værum óttarlega mikil jólabörn á þessu heimili," segir Magni.

„Gömul jólalög kveikja þetta stundum í mér og reyndar líka ef ég lendi í því að syngja jólalög opinberlega."

„Ég dett samt yfirleitt ekkert í jólaskapið fyrr en ég finn lyktina af hryggnum í ofninum," svarar Magni aðspurður hvað kemur honum í hátíðarskap.

„Ég á mjög margar yndislegar minningar frá jólunum," segir Magni þegar talið berst að góðum minningum tengdum jólahaldi.

„Það eru ríkar jólahefðir heima á Borgarfirði og ein af þeim sem ég hlakkaði alltaf mest til sem barn var að hitta ættingjana á aðfangadagskvöld því þegar allir voru búnir að opna pakkana og slappa svolítið af söfnuðust allir saman heima hjá ömmu og afa og fengu sér smá kvöldsnarl."

„Þetta finnst mér ennþá stór hluti af jólahaldinu þó svo að ég verði nokkrum dögum of seinn þetta árið," segir hann.

Hvar verður fjölskyldan á aðfangadag? „Við ætlum að vera heima hjá okkur á Akureyri litla fjölskyldan - það stefnir meira að segja í að við eldum allt sjálf," segir [email protected]