Lara Stone hélt upp á afmælið sitt í kjól frá Kalda

„Þetta er mjög gaman enda er hún ein af mínum uppáhaldsfyrirsætum," segir Katrín Alda Rafnsdóttir fatahönnuður. Ofurfyrirsætan Lara Stone klæddist kjól frá merki hennar Kalda á dögunum.

Katrín og Stone eiga sameiginlegan kunningja en það var Stone sjálf sem hafði samband við Katrínu og bað hana um þennan tiltekna kjól því hana langaði að klæðast honum á afmælinu sínu í lok desember.

„Það var gaman að hún skyldi hafa samband að fyrra bragði en hún hafði séð kjólinn hjá vinkonu minni. Það var auðvitað lítið mál að senda henni kjólinn og ég laumaði nokkrum flíkum í viðbót ofan í pakkann," segir Katrín, hönnuður og eigandi Kalda ásamt systur sinni Rebekku en þær eru einnig með búðina Einveru á Laugavegi.

Lara Stone er ein frægasta fyrirsæta heims og meðal annars andlit Calvin Klein, Prada, Louis Vuitton, H&M og Versace. Árið 2010 var hún á toppnum yfir vinsælustu fyrirsætur heims og er í sjöunda sæti á lista Forbes yfir launahæstu fyrirsætur síðasta árs. Stone giftist breska grínistanum David Walliams úr Little Britain árið 2010.

Stone sendi Katrínu mynd af sér í kjólnum og þakkaði kærlega fyrir sig í leiðinni. „Hún var mjög ánægð með allt sem við sendum og við ætlum að vera í áframhaldandi samstarfi. Það er gaman að fá svona viðurkenningu frá einhverjum sem maður hefur fylgst með lengi og hvetur mann áfram," segir Katrín en fatamerkinu Kalda hefur verið vel tekið og hafa til að mynda sænska fyrirsætan Carolina Winberg og breska söngkonan Pixie Lott sést klæðast fatnaði frá þeim.

„Lott er með blogg á heimasíðu breska Vogue og hefur ítrekað klæðst flíkum frá Kalda sem er hið besta mál."

Katrín Alda fullyrðir að þetta sé besta markaðssetningin og raun betra fyrir þær en að kaupa auglýsingu í blaði.

„Þetta skiptir miklu máli og við höfum alveg hugsað út í að senda frægum einstaklingum fatnað en það eru hönnuðir að gera reglulega," segir Katrín sem þessa dagana er að undirbúa sig fyrir tískuvikurnar í New York, London og París þar sem Kalda verður til sýnis.

Kalda er selt í versluninni Liberty í London og hefur Katrín því í hyggju að vera með annan fótinn úti á þessu ári. „Við ætlum að herja á erlenda markaðinn núna en stígum varlega til jarðar og tökum einn dag í einu í þeim efnum."

[email protected]