Bílskúrinn: Spennandi síðdegi á Silverstone

Lewis Hamilton á Mercedes minnkaði forskot liðsfélaga síns í heimsmeistarakeppni ökumanna niður í eitt stig með því að vinna á heimavelli sínum, síðustu helgi.

Nico Rosberg á Mercedes, liðsfélagi Hamilton kom annar í mark en hlaut refsingu. Er framlenging á samningi Kimi Raikkonen leiðinlega örugg ákvörðun að hálfu Ferrari? Er Red Bull liðið betra en Ferrari? Þetta og fleira í Bílskúrnum, uppgjöri hvers kappaksturs hér á Vísi.

Spennan í stigakeppninni

Munurinn á topp ökumönnunum er eitt stig. Rosberg leiðir með 168 stig en Hamilton eltir hann hratt uppi þessi misserin og er kominn með 167 stig. Næstur á eftir Mercedes mönnum er Raikkonen hjá Ferrari sem er 62 stigum á eftir Rosberg. Daniel Ricciardo á Red Bull er fjórði, 68 stigum á eftir Rosberg.

Bilið á milli ökumanna gæti því varla verið minna og spennan á milli þeirra er nánast áþreifanleg. Þeir töluðust ekki við í kæliherberginu eftir kappaksturinn.

Þegar kemur að bílasmiðum er forskot Mercedes liðsins slíkt að engum dettur annað í hug í augnablikinu en að liðið hirði þriðja heimsmeistaratitil bílasmiða í röð.

Leiðbeiningar til Rosberg grundvalla refsingu

Rosberg lenti í vandræðum með gírkassann undir lok keppninnar. Hann lenti í því að festast í sjöunda gír. Liðið leiðbeindi honum að skipta yfir sjöunda gír.

Dómarar keppninnar voru töluvert lengi að taka ákvörðun um refsingu Þjóðverjans en að endingu varð niðurstaðan sú að hann fengi 10 sekúndu refsingu fyrir leiðbeiningarnar. Það gerði það að verkum að annað sætið færðist til Max Verstappen sem kom yfir línuna í þriðja sæti. Rosberg varð því þriðji og þess vegna munar einungis einu stigi á Hamilton og Rosberg.

Raikkonen og rulla hans hjá Ferrari

Kimi Raikkonen er þriðji í heimsmeistarakeppni ökumanna. Hann er þó búinn að eiga slakt tímabil að mörgu leyti. Hann lenti í vandræðum í Mónakó og gaf út eftir keppnina að honum leiddist brautin.

Líklega hefur Sebastian Vettel haft sitt að segja um það hvort nýr ökumaður kæmi inn í liðið. Þeim Raikkonen kemur vel saman og Raikkonen virðiat vera ágætlega sáttur við að vera annar ökumaður hjá Ferrari, þrátt fyrir að hann leiði stigakeppnina innbyrgðis í liðinu.

Ferrari virðist ekki reiðubúið að taka stórar áhættur. Því miður fyrir Ferrari aðdáendur er líklegt að liðið hafi fá svör við Mercedes og hugsanlega Red Bull það sem eftir er af tímabilinu.

Hafa nautin tekið fram úr hestunum?

Nautin (Red Bull) virtust rúlla yfir hrossin (Ferrari) á Silverstone brautinni um helgina. Red Bull hefur haldið haus og einbeitt sér að því að bæta sig og vinnan virðist skila árangri. Red Bull er eina liðið sem hefur unnið keppni í ár, að Mercedes liðinu undanskyldu.

Ferrari heldur áfram að glíma við óáreiðanleika og vandræðagang. Vettel þurfti aftur að taka út refsingu fyrir að taka nýjan gírkassa um borð í bíl sinn.

Ökumaður dagsins

Max Verstappen, ökumaður Red Bull hlýtur heiðurinn þessa vikuna. Bæði að mati ofanritaðs og áhorfenda sem kusu á heimasíðu Formúlu 1.

Verstappen barðist af hörku við Rosberg á brautinni og sýndi frábæra takta í baráttunni við sér reyndari mann. Verstappen var greinilega að finna sig á rakri brautinni.