Besta-spáin 2024: Fiðringur í Firðinum

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild kvenna með árlegri spá sinni fyrir mótið. Keppni í deildinni hefst með tveimur leikjum sunnudaginn 21. apríl.

Íþróttadeild spáir FH 4. sæti Bestu deildarinnar í sumar og liðið fari upp um tvö sæti frá því í fyrra.

Fæstir gerðu miklar væntingar til FH-inga sem nýliða í Bestu deildinni í fyrra. En liðið kom skemmtilega á óvart og eftir átján umferðir var það með jafn mörg stig og Þróttur í 5. sæti deildarinnar. FH-ingar misstu móðinn í úrslitakeppninni og unnu ekki leik þar en enduðu samt í 6. sæti sem þótti fyrirtaks árangur.

Nú þarf FH að taka næsta skref; forðast að sogast ofan í annars tímabils kviksyndið og byggja ofan á árangur síðasta tímabils. Og það vantar ekki metnaðinn í Kaplakrika, allavega miðað við leikmennina sem liðið hefur fengið í vetur.

Arna Eiríksdóttir, sem lék með FH á láni í fyrra, skipti alfarið yfir í Fimleikafélagið frá Val, Hanna Kallmaier og Ída Marín Hermannsdóttir komu frá sama liði, Andrea Rán Snæfeld Hauksdóttir úr atvinnumennsku, Bryndís Halla Gunnarsdóttir frá Breiðabliki og Breukelen Woodward úr Fram. 

Þetta er mikill liðsstyrkur. Arna, Andrea og Ída hafa leikið landsleiki, Hanna er afar traustur miðjumaður, Bryndís Halla mikið efni og Breukelen skoraði níu mörk í Lengjudeildinni í fyrra.

Af þeim leikmönnum sem eru farnir frá FH munar mestu um Shainu Ashouri sem fór í Víking og fyrirliðann Sunnevu Hrönn Sigurvinsdóttur. En FH-ingar koma klárlega út í plús á félagaskiptamarkaðnum.

Það gæti þó tekið FH-liðið einhvern tíma til að slípa sig saman eftir breytingarnar. Arna, Andrea og Ída spiluðu til að mynda ekkert í Lengjubikarnum. En ef þær komast fljótt inn í hlutina hjá Fimleikafélaginu ætti það að geta átt gott sumar.

Lykilmenn

Fylgist með

Selma Sól Sigurjónsdóttir skoraði tólf mörk fyrir ÍH í 2. deildinni í fyrra eftir að hafa leikið með FH sumarið 2022. Hún er nú komin aftur til Fimleikafélagsins og spilaði alla leiki liðsins í Lengjubikarnum og skoraði þrjú mörk. Sólin hennar Selmu gæti skinið skært í sumar. 

Í besta/versta falli

Ef allt gengur samkvæmt óskum gæti FH híft sig upp í 3. sætið en ef allt fer í steik fer liðið varla neðar en í 6. sæti, sama sæti og það endaði í á síðasta tímabili.