Sam­einaðu hreyfingu og hlátur í Lyfju­göngunni

„Við hjá Lyfju brennum fyrir að efla heilsu landsmanna og þessi viðburður er svo sannarlega til þess gerður að næra líkama og sál,“ segir Arnheiður Leifsdóttir, markaðsstjóri Lyfju. „Við leggjum áherslu á alhliða heilsu í gegnum markaðssamskipti okkar og á hreyfingin einmitt sviðið hjá okkur í sumar. Allir eiga sína uppáhalds hreyfingu og við viljum hvetja sem flesta til að gera meira af því sem þeir elska á hverjum degi. Við störfum undir göfugu markmiði sem er að lengja líf og allar okkar aðgerðir styðja við það markmið, þar á meðal Lyfjugangan og uppistandið.“

Það er Inga Berg sem hefur umsjón með Lyfjugöngunni sem samtvinnar göngur og jákvæða sálfræði. „Það er hennar trú að göngur í góðum félagsskap sé einhver albesta leiðin til að huga að heilsunni.“

Í fyrra bauð Lyfja upp á sambærilegan viðburð með uppistandaranum og leikkonunni Sögu Garðarsdóttur sem vakti mikla lukku. „Því endurtökum við nú leikinn en bætum hreyfingu í formi göngu við.“

Dóra DNA þarf vart að kynna en hann á langan feril í uppistandi og er einn af okkur vinsælustu uppistöndurum í dag. Hann hefur einnig sent frá sér eina skáldsögu og komið að handritaskrifum fyrir sjónvarp og má þar m.a. nefna sjónvarpsseríuna Aftureldingu sem sýnd var í Ríkissjónvarpinu nýlega við miklar vinsældir.

Hann mun taka vel á móti göngufólkinu í fallegu rjóðri eftir létta 3,5 km göngu. „Það verður bara skemmtilegt að taka á móti göngugörpunum og reyna að koma þeim til að hlæja. Þetta verður bara uppistand, glens og grín eins og sagt er. Ég hef verið iðinn við að skemmta í allan vetur og er mjög vel æfður. Svo leggur maður þetta á hilluna yfir sumartímann. Þetta er því síðustu forvöð til að sjá mig fyrir sumarið. Vonandi verðu fjölmennt enda er Elliðaárdalurinn frábært útivistarsvæði fyrir fólk á öllum aldri.“

Hittumst við kaffihúsið Á Bístró í Elliðaárstöð við Rafstöðvarveg 6 kl. 17.45. Gangan hefst kl. 18, öll velkomin og aðgangur ókeypis.