Hægt og ró­lega að finna stílinn sinn aftur eftir barn­eignir

Hún leggur upp úr því að versla íslenska hönnun og er hrifin af einstökum flíkum en Helga er viðmælandi vikunnar í Tískutali.

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Hvað hún er síbreytileg og lífgar upp á lífið og tilveruna. Það eru engin boð og bönn og mér finnst svo gaman þegar fólk er samkvæmt sjálfum sér í stíl óháð hvað er í tísku hverju sinni.

Hver er uppáhalds flíkin þín og af hverju?

Ég á svo margar uppáhalds flíkur. Gamall leðurjakki sem tengdamóðir mín keypti á Ítalíu fyrir mörgum árum er ofarlega á listanum en svo get ég líka nefnt Frankie Shop blazerinn minn, finnst ég alltaf geta gripið í hann. 

Bari-settið mitt er líka algjört uppáhalds og fer ég undantekningarlaust í það um leið og ég kem heim úr vinnu. Nýjasta flíkin í skápnum er svo brún Teddy kápa úr Fou22 og trónir hún mjög ofarlega á listanum núna.

Eyðirðu miklum tíma í að velja föt hverju sinni?

Það fer eftir tilefni. Dags daglega þá yfirleitt hendi ég mér bara í eitthvað sem ég er í stuði fyrir þann daginn. Svo reyni ég líka að klæða mig eftir veðri. 

Fyrir ákveðin tilefni á ég það svo alveg til að ofhugsa fatavalið og eyði mjög miklum tíma í að pæla og spekúlera í hverju ég vil vera.

Hvernig myndirðu lýsa stílnum þínum?

Ég myndi segja að hann væri afslappaður og frekar minimalískur. Síðustu ár hef ég reynt að kaupa færri flíkur sem hafa mikið notagildi. Mitt go-to dress myndi ég segja að væru góðar víðar gallabuxur eða suit buxur, þægilegur stuttermabolur og næs strigaskór. 

Ég á mér nokkrar uppáhalds búðir hér á Íslandi sem selja vandaðar og góðar flíkur sem endurspegla minn stíl og er ég því mjög dugleg að versla hér á Íslandi og styðja við íslenska verslun.

Hefur stíllinn þinn breyst mikið í gegnum tíðina og hvernig þá?

Já algjörlega. Ég hef farið allan hringinn. Ég æfði listskauta þegar ég var ung og var því í íþróttafötum flesta daga alla grunnskólagönguna. Ég myndi segja að tískuáhuginn hafi svo byrjað í menntaskóla og hef ég tekið allskonar misgóð tímabil. 

Eftir að ég eignaðist börnin mín fannst mér ég svo smá hafa tapað stílnum mínum, ég átti einhvern veginn erfitt með að átta mig á hvað ég fílaði, sem er mjög ólíkt mér. Ég hef því hægt og rólega verið að finna stílinn minn aftur síðustu tvö árin.

Nýturðu þess að klæða þig upp?

Já algjörlega. Elska að vera búin að finna mér næs outfit sem mér líður vel í og kíkja út!

Hvaðan sækirðu innblástur í tískunni?

Alls staðar að. Elska að setjast niður í stórborg og „people-watcha“ eða fylgjast með fólki. Ég er einmitt á leið til Parísar í haust og get ekki beðið eftir að drekka í mig innblástur frá fólkinu þar. 

Svo er svo mikið að flottum konum hérna heima sem og í Skandinavíu sem eru duglegar að setja á Instagram og fæ ég klárlega innblástur frá þeim. Einnig á ég einstaklega smekklegar vinkonur.

Ertu með einhver boð og bönn þegar það kemur að klæðaburði?

Nei myndi ekki segja það. Eina sem mér dettur í hug er að ég klæði mig alls ekki í óþægileg föt, sama hve flott þau eru. Mér verður að líða vel í flíkunum.

Hver er eftirminnilegasta flík sem þú hefur klæðst og af hverju?

Bleikur leðurjakki sem vinkona mín keypti á markaði í Flórens. Ég varð ástfangin af honum þegar ég sá hann hjá henni og fékk að pakka honum með til London þegar ég skrapp í helgarferð þangað. Hann var svo ótrúlega cute.

Býrðu yfir einhverju góðu ráði þegar það kemur að tísku?

Vera samkvæmur sjálfum sér í stað þess að elta trend, vera meðvituð um notagildið sem flíkin hefur upp á að bjóða áður en hún er keypt. Svo auðvitað velja gæðameiri flíkur fram yfir magn. Kaupa minna og vanda valið betur.