NBA

Fréttir úr körfuboltadeild hinna bestu.

Ráðast örlög Phoenix Suns í nótt?

Hann verður ekki af verri endanum sjónvarpsleikurinn á NBA TV í nótt þegar Phoenix Suns tekur á móti Los Angeles Lakers í fyrstu umferð úrslitakeppni Vesturdeildarinnar í NBA. Lakers getur með sigri í kvöld slegið Phoenix út og komist mjög óvænt í aðra umferð keppninnar, þar sem liðið mætir þá grönnum sínum í LA Clippers. Það yrði fyrsta einvígi grannliðanna í úrslitakeppni sögu NBA. Bein útsending frá leiknum hefst klukkan 2:30 eftir miðnætti.

Sport 2. maí 2006 15:30

Eignuðust dætur með 6 mínútna millibili

Fyrrum samherjarnir hjá Los Angeles Lakers, þeir Shaquille O´Neal og Kobe Bryant, höfðu góða ástæðu til að fagna í gærmorgun þegar þeir eignuðust báðir dætur með aðeins 6 mínútna millibili. Þeir félagar sættust í vetur eftir að hafa ekki talast við í meira en eitt ár, þar sem þeir tókust á í fjölmiðlum og kölluðu hver annan öllum illum nöfnum.

Sport 2. maí 2006 13:38

Diaw tók mestum framförum

Hinn fjölhæfi Boris Diaw hjá Phoenix Suns var í gærkvöldi kjörinn framfarakóngur ársins í NBA deildinni. Diaw, sem er franskur landsliðsmaður, kom til Phoenix frá Atlanta sem uppfyllingarefni í skiptum fyrir Joe Johnson síðasta sumar og fáa óraði fyrir því hve vel hann átti eftir að smella inn í leik liðsins.

Sport 2. maí 2006 12:38

Clippers áfram í fyrsta sinn í 30 ár

Los Angeles Clippers gekk í gær frá Denver Nuggets 101-83 og vann einvígi liðanna í fyrstu umferð úrslitakeppni Vesturdeildarinnar auðveldlega 4-1. Þetta er í fyrsta sinn í yfir þrjá áratugi sem félagið vinnur seríu í úrslitakeppni. Þá kláraði Dallas dæmið gegn Memphis og Detroit komst í vænlega stöðu gegn Milwaukee.

Sport 2. maí 2006 11:10

Tekst Dallas að klára dæmið?

Fjórði leikur Memphis Grizzlies og Dallas Mavericks verður sýndur í beinni útsendingu á NBA TV klukkan tólf á miðnætti í kvöld. Þar ræðst hvort Memphis nær að halda lífi í einvíginu eða lætur sópa sér út úr úrslitakeppninni í þriðja sinn í röð. Dallas hefur yfir 3-0 í einvíginu og hefur tapað 11 fyrstu leikjum sinni í úrslitakeppni í sögu félagsins, sem er NBA met.

Sport 1. maí 2006 21:36

Sacramento burstaði meistarana

Dramatíkin í fyrstu umferð úrslitakeppni NBA í vor er að verða ótrúleg og í lokaleik gærkvöldsins gerði lið Sacramento sér lítið fyrir og rótburstaði meistara San Antonio 102-84 og jafnaði metin í einvígi efsta og neðsta liðsins í úrslitakeppni Vesturdeildarinnar í 2-2.

Sport 1. maí 2006 05:10

Kobe Bryant skaut Phoenix upp að vegg

Kobe Bryant sýndi sannarlega úr hverju hann var gerður í gærkvöldi þegar hann tryggði Los Angeles Lakers 99-98 sigur á Phoenix Suns með ótrúlegri sigurkörfu í framlengingu og nú vantar Lakers aðeins einn sigur til að slá Phoenix út úr keppninni í fyrstu umferð úrslitakeppni Vesturdeildarinnar. Bryant var stórkostlegur á lokasprettinum á meðan verðmætasti leikmaður deildarinnar, Steve Nash, gerði afdrifarík mistök sem kostuðu Phoenix sigurinn.

Sport 1. maí 2006 04:49

Arenas kláraði Cleveland

Gilbert Arenas skoraði 20 af 34 stigum sínum í fjórða leikhlutanum í gærkvöldi þegar lið hans Washington jafnaði metin gegn Cleveland í 2-2 með góðum 106-96 sigri í fjórða leik liðanna sem sýndur var í beinni útsendingu á NBA TV. LeBron James endurskrifaði metabækurnar hjá Cleveland í fyrri hálfleik, en þurfti að sætta sig við tap þrátt fyrir að skora 38 stig.

Sport 1. maí 2006 04:23

Miami í vandræðum

Chicago Bulls afrekaði það í gær að jafna metin í einvígi sínu við Miami Heat í 2-2 með góðum 93-87 sigri á heimavelli sínum í fjórða leik liðanna. Flestir bjuggust við að það yrði aðeins formsatriði fyrir Miami að afgreiða liðið í sjöunda sæti í Austurdeildinni, en baráttuglaðir leikmenn Chicago eru langt í frá búnir að segja sitt síðasta gegn hærra skrifuðum andstæðingum sínum.

Sport 1. maí 2006 04:00

Washington - Cleveland í beinni á NBA TV

Úrslitakeppni NBA heldur áfram á fullu í kvöld og klukkan 23:30 verður á dagskrá NBA TV fjórði leikur Washington Wizards og Cleveland Cavaliers. Cleveland hefur yfir 2-1 í einvíginu, en leikur kvöldsins fer fram í höfuðborginni Washington. Forvitnilegt verður að sjá hvernig liði Washington tekst að ráða við undrabarnið LeBron James, sem skoraði 41 stig og tryggði Cleveland sigur í síðasta leik.

Sport 30. apríl 2006 22:06

Juventus í góðri stöðu

Juventus hefur þriggja stiga forskot á AC Milan á toppi ítölsku A-deildarinnar í knattspyrnu eftir leiki dagsins, en aðeins tvær umferðir eru eftir af deildarkeppninni. Juventus lagði Siena 3-0 með mörkum frá Mutu, Trezeguet og Vieira, en AC Milan lagði Livorno 2-0 með mörkum frá Filippo Inzaghi. Juve hefur 82 stig á toppnum, AC Milan er með 79 stig og Inter er í þriðja sætinu með 74 stig eftir 1-0 tap fyrir Empoli.

Sport 30. apríl 2006 20:56

Chicago - Miami á Sýn

Fjórði leikur Chicago Bulls og Miami Heat í úrslitakeppni Austurdeildar NBA verður sýndur á Sýn í kvöld klukkan 20:50, eða skömmu eftir að flautað hefur verið til leiksloka í viðureign Osasuna og Real Madrid. Chicago freistar þess að jafna metin í seríunni í 2-2 eftir mjög góðan sigur í síðasta leik.

Sport 30. apríl 2006 19:29

Milwaukee Burstaði Detroit

Nokkuð óvænt úrslit urðu í úrslitakeppni NBA í nótt þegar Milwaukee burstaði Detroit 124-104 á heimavelli sínum og minnkaði muninn í 2-1 í einvígi liðanna. New Jersey jafnaði metin í 2-2 gegn Indiana, en Dallas og LA Clippers eru nú hársbreidd frá því að komast í aðra umferð eftir að liðin unnu sinn þriðja leik í rimmum sínum.

Sport 30. apríl 2006 17:34

New Jersey jafnaði gegn Indiana

New Jersey Nets jafnaði í kvöld metin í 2-2 í einvígi sínu við Indiana Pacers í fyrstu umferð úrslitakeppninnar í Austurdeild NBA. Vince Carter skoraði 28 stig fyrir New Jersey og Richard Jefferson skoraði 22. Jermaine O´Neal var atkvæðamestur í liði heimamanna með 20 stig. Næsti leikur fer fram í New Jersey á þriðjudagskvöldið.

Sport 29. apríl 2006 22:19

Mike Miller besti varamaðurinn

Mike Miller, leikmaður Memphis Grizzlies, var í gærkvöld kjörinn besti varamaðurinn á tímabilinu í NBA deildinni með nokkuð miklum yfirburðum. Miller skoraði 13,7 stig og hirti 5,4 fráköst að meðaltali í leik í vetur, en hann var færður á varamannabekkinn í upphafi leiktíðar þegar Mike Fratello þjálfari breytti uppstillingu sinni til að ná meiru út úr liðinu. Það heppnaðist einstaklega vel og var Miller lykilmaður liðsins áfram þó hann kæmi af bekknum.

Sport 29. apríl 2006 21:15

Leikmenn Miami fá sektir og leikbönn

Leikmenn Miami Heat hafa verið meira áberandi fyrir agabrot og kveinstafi en að spila góðan körfubolta það sem af er úrslitakeppninni í ár. Udonis Haslem hefur þegar setið af sér bann fyrir að láta skapið hlaupa með sig í gönur og nú þarf Shaquille O´Neal að opna budduna og greiða háa sekt, á meðan James Posey verður í banni í næsta leik fyrir agabrot í þriðja leik liðsins við Chicago í fyrrinótt.

Sport 29. apríl 2006 20:40

Körfuboltaveisla um helgina á Sýn og NBA TV

Það verður mikið um dýrðir fyrir áhugamenn um NBA körfuboltann á NBA TV og sjónvarpsstöðinni Sýn um helgina og veislan hefst í kvöld með tveimur útsendingum. Þriðji leikur Memphis og Dallas verður sýndur klukkan 21:50 á Sýn og klukkan 2:30 verður svo á dagskrá fjórði leikur Denver og LA Clippers á NBA TV.

Sport 29. apríl 2006 19:45

Dramatíkin í hámarki í nótt

Þrír háspennuleikir fóru fram í úrslitakeppni NBA-deildarinnar í nótt og réðust úrslitin í tveimur þeirra í blálokin. LeBron James var skoraði sigurkörfu Cleveland gegn Washington og Sacramento lagði meistarana með körfu um leið og lokaflautið gall. Þá er lið Los Angeles Lakers komið í bílstjórasætið gegn Phoenix eftir sigur á heimavelli sínum í þriðja leik liðanna.

Sport 29. apríl 2006 05:16

Sacramento - San Antonio í beinni

Þriðji leikur Sacramento Kings og San Antonio Spurs í fyrstu umferð úrslitakeppni Vesturdeildar verður sýndur í beinni útsendingu á NBA TV klukkan tvö í nótt. San Antonio vann yfirburðasigur í fyrsta leiknum, en var heppið að vinna annan leikinn þar sem úrslitin réðust í framlengingu. Ron Artest verður á ný í liði Sacramento eftir að hafa tekið út leikbann í síðasta leik.

Sport 28. apríl 2006 19:45

Chicago burstaði Miami

Chicago Bulls gerði sér lítið fyrir og burstaði Miami á heimavelli sínum 109-90 í úrslitakeppni NBA í gærkvöldi og minnkaði muninn í 2-1 í einvíginu. Lið Miami virkaði alls ekki sannfærandi í leiknum og þarf virkilega að taka sig saman í andlitinu fyrir næsta leik í Chicago ef ekki á illa að fara. Shaquille O´Neal átti einhverja slökustu frammistöðu á ferlinum og skoraði aðeins 2 stig í fyrstu þremur leikhlutunum í leik sem sýndur var á NBA TV.

Sport 28. apríl 2006 10:22

Lakers jafnaði í Phoenix

Kobe Bryant og félagar í LA Lakers jöfnuðu í nótt metin í rimmu sinni við Phoenix með góðum 99-93 sigri í Phoenix í öðrum leik liðanna og fara næstu tveir leikir fram í Los Angeles. Kobe Bryant hafði hægt um sig framan af leik en endaði með 29 stig og 10 fráköst. Steve Nash var atkvæðamestur í liði Phoenix með 29 stig og 9 stoðsendingar.

Sport 27. apríl 2006 05:22

Annar leikur Dallas og Memphis í beinni

Annar leikur Dallas Mavericks og Memphis Grizzlies verður sýndur í beinni útsendingu á NBA TV á miðnætti í kvöld. Dallas var í bílstjórasætinu í fyrsta leiknum og vann nokkuð sannfærandi sigur, en lið Memphis er enn að bíða eftir fyrsta sigri sínum í úrslitakeppni í stuttri sögu félagsins og hefur tapað öllum níu leikjum sínum hingað til.

Sport 26. apríl 2006 20:07

Diaw líklegur framfarakóngur

Hinn fjölhæfi franski leikmaður Boris Diaw hjá Phoenix Suns þykir líklegastur til að verða kjörinn framfarakóngur NBA deildarinnar í ár, en á hverju ári er einn leikmaður verðlaunaður sérstaklega fyrir að hafa náð mestum framförum frá árinu áður.

Sport 26. apríl 2006 16:15

Kenyon Martin í bann

Framherjinn Kenyon Martin hefur verið settur í bann af liði sínu Denver Nuggets í óákveðinn tíma fyrir hegðun sem þótti hafa slæm áhrif á andann í liðinu. Martin hefur átt við hnémeiðsli að stríða í allan vetur og hefur ekki geta beitt sér að fullu í úrslitakeppninni, en hann á að hafa látið þjálfara sinn George Karl heyra það í hálfleik í tapinu gegn LA Clippers í fyrrakvöld.

Sport 26. apríl 2006 13:36

Verður Nash valinn aftur?

Nokkur dagblöð í Bandaríkjunum greina frá því í dag að kanadíski leikstjórnandinn Steve Nash hjá Phoenix Suns verði kjörinn verðmætasti leikmaður NBA deildarinnar annað árið í röð á næstu vikum. Nash lék betur í vetur en í fyrra og fór fyrir liði Phoenix sem náði mjög góðum árangri þrátt fyrir að vera án Amare Stoudemire.

Sport 26. apríl 2006 13:18

LeBron James kippt niður á jörðina

LeBron James sýndi að hann á nokkuð eftir ólært í gær þegar lið hans Cleveland tapaði öðrum leiknum við Washington á heimavelli sínum 89-84. James skoraði 26 stig fyrir Cleveland, en tapaði 10 boltum og gerði mjög dýr klaufamistök á lokasprettinum sem kostuðu lið hans sigurinn. Lið Washington lék mikið betur en í fyrsta leiknum með Gilbert Arenas sem sinn besta mann, en hann skoraði 30 stig.

Sport 26. apríl 2006 12:29

Sýningin heldur áfram í kvöld

Úrslitakeppni NBA heldur áfram á fullu í kvöld og alls eru þrír leikir á dagskránni. Sjónvarpsleikurinn á NBA TV er annar leikur Cleveland Cavaliers og Washington Wizards og er hann á besta tíma klukkan 23:00. LeBron James var maður fyrsta leiksins og náði þrefaldri tvennu í fyrsta leik sínum í úrslitakeppni á ferlinum.

Sport 25. apríl 2006 21:35

Johnson þjálfari ársins

Nú hefur verið staðfest að Avery Johnson hjá Dallas Mavericks hafi verið kjörinn þjálfari ársins í NBA deildinni. Johnson hafði nokkra yfirburði í valinu og hlaut 419 atkvæði, þar af 63 í fyrsta sæti. Mike D´Antoni hjá Phoenix varð annar í valinu með 247 atkvæði (27 í fyrsta sæti) og Flip Saunders hjá Detroit Pistons varð þriðji með 233 (18 í fyrsta sæti) stig.

Sport 25. apríl 2006 19:44

Verður Johnson þjálfari ársins?

Nokkur dagblöð í Dallas og nágrenni segjast í dag hafa heimildir fyrir því að Avery Johnson, þjálfari Dallas Mavericks, verði í kvöld útnefndur þjálfari ársins í NBA deildinni. Johnson stýrði Dallas til 60 sigra í deildarkeppninni í vetur og hefur enginn þjálfari í sögu deildarinnar átt betri byrjun. Johnson tók við liðinu af Don Nelson í fyrra og stýrði liði Vesturdeildarinnar í Stjörnuleiknum í febrúar.

Sport 25. apríl 2006 15:00

Miami og Clippers í góðri stöðu

Miami Heat og LA Clippers eru komin í góða stöðu í fyrstu umferð úrslitakeppninnar í NBA eftir sigra í gær. Miami Heat lagði Chicago 115-108 og náði 2-0 forystu í einvíginu eins og LA Clippers gegn Denver eftir 98-87 sigur á heimavelli í gær.

Sport 25. apríl 2006 13:38

Mest lesið