Yfir 100 þúsund börn hafa misst heimili sín

Yfir hundrað þúsund börn hafa misst heimili sín í kjölfar hamfaranna í Japan. Samtökin Barnaheill – Save the Children vara við því að barnshafandi konur gætu þurft að fæða í neyðarskýlum sem komið var upp í kjölfar jarðskjálfta og flóðbylgju sem reið yfir landið.

Nao Saito, sem á að eiga barn sitt í næstu viku, hitti fulltrúa Save the Children í Shichigo-barnaskólanum sem breytt hefur verið í fjöldahjálparstöð. Hún segir að vegna skorts á eldsneyti sé hún hrædd um að ná ekki í tíma á sjúkrahúsið í borginni Sendai.

Stephen McDonald, sem leiðir neyðaraðstoð barna í Japan, segir um hálfa milljón manns vera á vergangi eftir flóðbylgjuna og margir þeirra búi í yfirfullum fjöldahjálparstöðvum á nær 600 kílómetra strandlengju Japans.

„Það er því miður hætt við að konur sem eru langt gengnar með barn neyðist til að fæða í þessum stöðvum," segir McDonald.

Petrína Ásgeirsdóttir, framkvæmdastjóri Barnaheilla, segir afar mikilvægt að bregðast eins skjótt við og auðið er. „Það er mikill fjöldi barna sem hefur misst heimili sín, skóla, ættingja og vini. Allt þeirra daglega líf er úr skorðum," segir Petrína. „Við leggjum mikla áherslu á að koma upp barnvænum svæðum. og nú hefur um 2.000 hjálparstöðvum verið komið á fót. Það er nauðsynlegt að sjá til þess að börnin fái öryggi og vernd, áfallahjálp og stuðning."

Mikill kuldi er nú í Japan og víðs vegar um borgina Sendai og annars staðar á flóðasvæðinu hafa myndast langar biðraðir við bensínstöðvar þar sem fólk bíður eftir eldsneyti. Um 4.000 skólar eyðilögðust í hamförunum.

Barnaheill – Save the Children á Íslandi standa fyrir söfnun fyrir börn og fjölskyldur þeirra í Japan. Hægt er að leggja þeim lið með því að hringja í söfnunarsíma 904 1900 (1.900 krónu framlag) eða 904 2900 (2.900 krónu framlag).

Einnig er hægt að leggja frjáls framlög á reikning samtakanna 0327-26–001989, kt. 521089-1059. [email protected]