Oddvitaáskorunin - Viljum minna af klækjum og refskák

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Sigurður Björn Blöndal leiðir lista Bjartrar framtíðar í Reykjavík í sveitarstjórnarkosningunum í vor:

„Ég heiti Sigurður Björn Blöndal, stundum kallaður S. Björn Blöndal eða bara Björn Blöndal. Ég er fæddur árið 1969 í Reykjavík. Var hress og glaður krakki en mjög þægur að sögn foreldra minna.

Ég er búinn að hlaupa af mér hornin og hef undanfarin 17 ár verði í hamingjusamri sambúð með Sigurbjörgu Gylfadóttur, menntaskólakennara. Við eigum tvo stráka, 10 og 15 ára.

Ég hef gert ýmislegt um ævina, er tónlistarmaður og hef leikið á bassa með hljómsveitinni HAM frá árinu 1988, með smá hléum. Ég hef unnið allskonar störf: verslunarmaður, framkvæmdastjóri, markaðstjóri, vörustjóri, kvikmyndaframleiðandi, skólaliði, blaðamaður, sjómaður, sorphreinsunarmaður, verkamaður, rútubílstjóri og nú síðast aðstoðarmaður og pólitískur ráðgjafi borgarstjóra.

Mér finnst skemmtilegt að vinna með fólki, leiðinlegra að vinna á móti því og reyni að forðast það. Síðasta haust kom upp sú staða að ég varð að ákveða hvort ég ætlaði að halda áfram að vinna á vettvangi borgarstjórnar eða snúa mér að öðrum verkefnum. Ég komst að þeirri niðurstöðu að mig dauðlangaði að halda áfram að vinna að borgarmálum og mig langaði mjög mikið til að gera mitt besta til að þessi yndislega borg okkar, Reykjavík, gæti orðið ennþá betri staður til að búa á, til að heimsækja, til að vera á og til að hugsa um.

Reykjavik er frábær, hún er glaði, gáfaði og skemmtilegi dvergurinn í hópi höfuðborga. Reykjavik er borg tækifæranna. Útlendingar eru vitlausir í Reykjavík.

Íslendingar kölluðu Reykjavík lengi vel sollinn, borg óttans og eitthvað þaðan af verra. Þetta hefur breyst. Reykjavík er ekki lengur forboðna borgin, hún er borgin okkar. Flestir þeir sem búa í Reykjavík eru stoltir af borginni sinni. Ef þú ert staddur í útlöndum, þá segirðu með stolti að þú sért frá Reykjavík. Alveg eins og þú játar því stoltur að Björk sé frá Íslandi.

Mér finnst frábært að búa í Reykjavík, þetta er borgin mín. Ég vil hvergi annarsstaðar búa.“

YFIRHEYRSLAN

Hver er fallegasti staðurinn á Íslandi?

Kverkfjöll.

Hundar eða kettir?

Hundar.

Hver er stærsta stundin í lífinu?

Ætli það sé ekki þegar ég fæddist.

Hver er uppáhaldsmaturinn þinn?

Steik og bernaise.

Hvernig bíl ekur þú?

Grand Cherokee árgerð 2001 - ekinn rúmlega 112.00 mílur.

Besta minningin?

Fæðing strákanna minna eru tvær góðar bestu minningar.

Hefur þú verið tekinn af lögreglunni?

Já.

Hverju sérðu mest eftir?

Engu.

Draumaferðalagið?

Eitthvað á fjallaskíðum

Hefur þú migið í saltan sjó?

Já.

Hvað er það skrýtnasta sem þú hefur gert?

Fara í framboð.

Hefur þú viðurkennt mistök?

Já.

Hverju ertu stoltastur af?

Strákunum mínum og síðustu 4 árum.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu [email protected].