Leita tveggja manna vegna vopnaðs ráns við Langholtskirkju

Lögreglan á höfuðborgarsvæðinu leitar tveggja manna vegna rannsóknar á ráni í Sólheimum við Langholtskirkju á níunda tímanum í gærkvöldi. 

Tveir, grímukæddir menn eru sagðir hafa komið að bifreið sem þar var. Þeir hafi ógnað fólkinu sem sat í bílnum með eggvopni og slegið til ökumannsins sem hlaut áverka af. Síðan hafi þeir rænt nokkru af munum úr bifreiðinni.

Tilkynning um málið barst lögreglu klukkan 20:20 í gærkvöldi. Þeir sem búa yfir vitneskju um málið eru vinsamlegast beðnir um að hafa samband við lögregluna á höfuðborgarsvæðinu í síma 444-1000, en upplýsingum má einnig koma á framfæri í tölvupósti á netfangið [email protected] eða í einkaskilaboðum á fésbókarsíðu Lögreglunnar á höfuðborgarsvæðinu.

Guðmundur Pétur Guðmundsson lögreglufulltrúi sagði í samtali við Vísi um málið á ellefta tímanum að a.m.k. einn væri grunaður í málinu en hefði verið farinn á brott af vettvangi þegar lögreglu bar að garði. Rannsókn málsins væri á frumstigi.