Telur að nýju leikmenn Vals verði bestu leikmenn Bestu deildarinnar

Runólfur Trausti Þórhallsson skrifar 7. mars 2022 23:30

Farið var yfir hvaða fimm leikmenn ættu að vera bestir í Bestu deildinni í síðasta þætti af Lengjubikarsmörkunum. Albert Brynjar Ingason, framherji Fylkis í Lengjudeildinni, setti listann saman og athygli vakti að tveir af nýjum leikmönnum Vals voru þar efstir á blaði.

Ástæðan fyrir því að Albert Brynjar setur Valsara í efstu tvö sætin er einfaldlega sú að hann hefur spáð því að Valur vinni mótið.

Listann má sjá hér að neðan en aðrir sem komu til greina voru til að mynda Gísli Eyjólfsson, Höskuldur Gunnlaugsson (báðir Breiðablik), Hallgrímur Mar Steingrímsson (KA) og Theódór Elmar Bjarnason (KR).

5. Kristinn Freyr Sigurðsson (FH)

Kristinn Freyr gekk í raðir FH frá Val eftir síðasta tímabil og telur Albert Brynjar að hann muni reynast FH-ingum vel.

4. Viktor Karl Einarsson (Breiðablik)

Viktor Karl hefur verið með betri leikmönnum deildarinnar í dágóða stund og virðist ekkert lát þar ætla að vera á.

3. Pablo Punyed (Víkingur)

Pablo var stór ástæða þess að Víkingur vann tvöfalt á síðustu leiktíð og verður hann áfram meðal bestu leikmanna deildarinnar.

2. Aron Jóhannsson (Valur)

Aron gekk í raðir Vals fyrir ekki svo löngu og telur Albert Brynjar að þessi fyrrum framherji bandaríska landsliðsins muni reynast happafengur.

1. Hólmar Örn Eyjólfsson (Valur)

Þessi fyrrverandi landsliðsmiðvörður Íslands gekk í raðir Vals frá norska stórliðinu Rosenborg og er búist við að hann muni gjörbreyta varnarleik Valsliðsins.

Í spilaranum hér að neðan má sjá þá Gumma Ben, Baldur Sigurðsson og Albert Brynjar ræða téðan lista en Gummi og Baldur nefndu einnig nokkur nöfn sem gætu skarað fram úr í sumar.

Klippa: Hverjir verða bestu fimm leikmenn Bestu deildar karla í sumar?

Fótbolti Besta deild karla Valur Íslenski boltinn

Mest lesið

Fleiri fréttir