Hvetur stjórnendur til að prófa önnur störf og að standa sjálfir í eldlínunni

„Að mínu mati hefur mér líka þótt þetta góð leið til að kynnast styrkleikum starfsfólksins og mér finnst tengingin við starfsfólk allt önnur en hún væri ella. Mín reynsla er að minnsta kosti sú að starfsfólk upplifir mann öðruvísi, virðingin og traustið sem myndast á milli starfsfólks og stjórnenda er meira.“

Í gær og í dag fjallar Atvinnulífið um hvernig hægt er að kynnast ólíkum störfum innan sama fyrirtækisins og hver ávinningurinn af því getur verið.

Allt frá símsvörun í framkvæmdastjórn

María Dís segir að hjá OK hafi ekki sérstaklega verið farið í æfingar eins og starfaskipti. Hins vegar sé fyrirtækjamenningin þannig að hjá OK hefur mjög margt starfsfólk fengið tækifæri til að vaxa í starfi.

„Við horfum alltaf fyrst inn á við þegar það opnast tækifæri á stöðum. Það er svo mikilvægt fyrir starfsfólk að upplifa og sjá að innan vinnustaðarins geta verið spennandi tækifæri til starfsþróunar. Fyrir vikið hafa margir hér fengið tækifæri til að sinna ólíkum störfum innan OK og almennt reynum við líka að leggja áherslu á fjölbreytileika verkefna hjá starfsfólki. Því það þarf svo sem ekkert alltaf að skipta um stöður sem slíkar þótt vinnan geti orðið meira spennandi ef við fáum að takast á við nýjar áskoranir,“ segir María og bætir því við að með því að leggja áherslu á fjölbreytileika í verkefnum sé hægt að vinna betur að því að draga fram styrkleika hvers og eins.

„Auðvitað þarf líka að vera jafnvægi til staðar, þannig að við ráðum líka inn nýtt fólk utan frá sem kemur þá með ferskan blæ, nýja reynslu og öðruvísi sýn.“

Sjálf segir María Dís hennar þróun í starfi hjá OK vera gott dæmi um það hvernig starfsþróun innan fyrirtækisins hefur gefið henni tækifæri til að kynnast ólíkum störfum innan fyrirtækisins og aukið þekkingu hennar og skilning á því að standa í eldlínunni.

„Ég byrja hjá OK sem þjónustufulltrúi árið 2013. Í því starfi fannst mér ég læra rosalega margt um starfsemina og fyrirtækið. Árið 2016 verð ég viðskiptastjóri og í því starfi kynntist ég því að vera meira í samskiptum við viðskiptavinina og lærði inn á þjónustu- og vöruframboð félagsins.“

María segir það líka hafa kennt sér mikið að hafa verið í alls kyns afleysingarstörfum á því tímabili sem hún starfaði sem þjónustufulltrúi. Þá hafi hún til að mynda kynnst störfum innan ólíkra deilda.

„Árið 2018 tek ég síðan við gæða- og öryggismálum fyrirtækisins og árið 2020 tek ég einnig við mannauðsmálunum. Þeim störfum sinnti ég samhliða þar til um síðustu áramót þegar annar starfsmaður tekur við gæða- og öryggismálunum.“

Í dag situr María Dís í framkvæmdastjórn félagsins en hjá OK starfa um 140 manns og að auki um 30 manns í dótturfélaginu Varist.

Ég mæli hiklaust með því að stjórnendur reyni að kynnast sem flestum störfum innan vinnustaðarins og þá sérstaklega að koma sér vel inn í störf starfsfólks þegar fólk tekur að sér nýjar stjórnendastöður. 

Ég hika sjálf ekkert við að fara í símsvörun ef þess þarf eða aðstæður hafa kallað á það. Enda getur maður lært mikið á því. Til að mynda hef ég hvatt nýráðinn stjórnanda hér hjá okkur að reyna hvað hann getur til að kynnast sem mest störfum sviðsins sem hann veitir forstöðu, með því að prófa að taka vaktina sjálfur í ýmsum verkefnum, þar á meðal símsvörun.“

Fólk en ekki kennitölur

María segist afar ánægð með þá vegferð sem hennar starfsframi endurspeglar og myndi ekki vilja hafa misst af því sem stjórnandi að hafa lært til svo margra ólíkra verka og starfa innan OK.

„Tvisvar sinnum hef ég tekið tímabundið við starfi forstöðumanns framlínuþjónustu, samhliða mannauðsstjórastarfinu og með því að gera það hef ég til dæmis áttað mig betur á störfum þess sviðs og samvirkninnar sem þar er. Að sinna tímabundið einhverju starfi getur því verið góð leið fyrir stjórnanda að kafa dýpra inn í verkefnin, ferla, flæði og flækjustig. Allt eitthvað sem kennir manni að skilja aðstæður betur.“

María segir ávinninginn af því að stjórnandi kynnist eldlínustörfum líka geta skilað sér í því að þegar verið er að bæta úr hlutum eða takast á við erfiðar áskoranir, er skilningurinn á því sem gera þarf allt annar en hann annars væri.

Þá gefi það stjórnendum stundum tækifæri til að stytta boðleiðir eða hagræða ferlum sem auðveldara er að átta sig á þegar maður kynnist tilteknu starfi eða verkefnum.

Að vinna í návígi með starfsfólki er líka svo verðmætt. Ekki aðeins það að maður kynnist styrkleikunum þeirra betur eða skilji störfin þeirra betur heldur er maður fyrir vikið ekki bara stjórnandi sem horfir alltaf yfir með kennitölurnar á skjánum, heldur er maður sýnilega hluti af hópnum og fær tækifæri til að kynnast einstaklingunum á bak við störfin.“

OK hefur tvívegis verið valið fyrirtæki ársins hjá VR sem gefur til kynna að mikil áhersla er lögð á ánægju starfsfólks í starfi.

„Kjarninn okkar er fyrst og fremst sá að við erum eitt lið. Sem þýðir að við leggjum okkur fram við að hjálpast að og ekkert okkar hikar við að ganga í þau verkefni eða störf sem þarf að sinna þegar eitthvað kemur upp. Það á líka við um okkur stjórnendurna. Ef matráðurinn okkar er til dæmis í fríi finnst mér jafn sjálfsagt og hverjum öðrum hér að stökkva þá út í Bónus og kaupa jógúrt eða annað sem vantar. Það má svo sem segja að það sé fjölskyldubragur yfir þessu hjá okkur þar sem vinnustaðamenningin og andrúmsloftið undirstrikar einfaldlega það að við leggjumst öll á eitt þegar á reynir.“

María telur stjórnendur oft geta miðlað og leitt á skilvirkari hátt ef þeir hafa góða þekkingu og skilning á störfum starfsfólksins.

„Segjum til dæmis í aðstæðum þar sem starfsfólk lendir í erfiðum viðskiptavini eða jafnvel dónalegum. Að hafa reynt það á eigin skinni er verðmæt reynsla og gefur okkur sem stjórnendum betur færi á að hjálpa fólki sem er til dæmis að stíga sín fyrstu skref í starfi að takast á við aðstæður sem geta komið upp með erfiðum viðskiptavini.“

María telur það af hinu góða að vinnustaðir leggi áherslu á starfsþróun og fjölbreytileika verkefna, því á endanum sé það dýrmæt reynsla fyrir bæði starfsmanninn og vinnustaðinn að þekkja ólík störf og verkefni hjá fyrirtækinu.

„Að fá reynslu af ólíkum störfum hefur verið gríðarlega gefandi og skemmtilegt og gefið mér dýrmæta innsýn inn í störfin, upplifun starfsfólks og ýmislegt fleira. Mér hefur fundist það ómetanlegt í alla staði að þekkja fólkið á gólfinu vel, ég á auðvelt með að taka upplýst samtöl við starfsfólk sem eru án efa öðruvísi samtöl en ef ég þekkti ekki svona vel til. Ég kann líka að meta störf starfsfólksins sem nýtist vel þegar verið er að ráða eða greina störf og verkefni og fleira í þeim dúr. Þannig að hiklaust mæli ég með því fyrir alla stjórnendur að reyna að kynnast fleiri störfum innan síns vinnustaðar.“