Einróma niðurstaða að Hörður sé eins og Kristján í Frozen

Rakel Sveinsdóttir skrifar 9. nóvember 2024 10:01

Þegar Hörður Arnarson, forstjóri Landsvirkjunar, fékk þá flóknu spurningu að svara hverjum hann líktist helst úr teiknimyndasögum, leitaði hann ráða hjá afastelpunum. Niðurstaðan var einróma: Hörður er eins og Kristján í Frozen því hann er svo mikill dýravinur. Vísir/RAX

Þegar Hörður Arnarson, forstjóri Landsvirkjunar, er búinn að hugleiða á morgnana, eldar hann ómótstæðilegan hafragraut fyrir sig og frúna. Moli drífur forstjórann út kvölds og morgna. Hvernig sem viðrar.

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna um klukkan hálf sjö alla daga vikunnar, stundum fyrr ef mikið er að gera. Væri alveg til í að sofa lengur um helgar en það gerist bara ekki, svo ég er oft búinn að vinna í einn eða tvo tíma áður en konan mín vaknar.“

Hvað er það fyrsta sem þú gerir á morgnana?

„Ég byrja yfirleitt daginn á að hugleiða í tuttugu mínútur. Síðan elda ég ómótstæðilegan hafragraut fyrir okkur hjónin sem borinn er fram með heimagerðu múslíi og eplum.

Ég fer síðan alltaf í göngutúr með hundinn minn Mola, algerlega óháð veðri. Á meðan lagar konan mín einstaklega gott kaffi sem ég drekk áður en ég fer í vinnuna.“

Ef þú værir hetja/karakter úr teiknimyndasögu, hver værir þú þá?

Ég horfi mjög lítið á teiknimyndir og ákvað því að biðja tvær afastelpur að svara þessari flóknu spurningu.

Einróma niðurstaða þeirra var Kristján í Frozen af því að hann væri svo mikill dýravinur.“

Hörður skipuleggur daginn í morgungönguferðunum með Mola. Hörður segir opið vinnurými tryggja gott aðgengi að sér á vinnustaðnum en til að vinna að ákveðnum verkefnum, blokkar hann yfirleitt nokkra hálfa daga í viku til að geta einbeitt sér að þeim. Vísir/RAX

Í hvaða verkefni ertu helst að vinna í þessa dagana?

„Landsvirkjun er alltaf með ótrúlega mörg járn í eldinum. Mikill tími fer hjá mér þessa mánuðina að styðja við fólkið sem er að vinna að því að koma virkjanaframkvæmdum við Búrfellslund, Hvamm, stækkun Sigöldu og Þeistareykja í gang.

Það eru líka miklar áskoranir tengdar slakri stöðu í vatnsbúskapnum þessa dagana. Það þarf að fylgjast náið með og ákveða hvernig við tökumst á við áhættu tengda henni.

Svo vonum við bara innilega að það rigni meira uppi á hálendinu áður en það kemur hávetur.“

Hvernig skipuleggur þú þig í vinnu?

„Ég skipulegg helstu áherslur dagsins í morgungönguferðinni með Mola. Ég er líka með vikulega „maður-á-mann“ fundi með þeim sem heyra beint undir mig, svo stýri ég framkvæmdastjórnarfundum tvisvar í viku og svo framvegis.

Þegar við fluttum í Katrínartúnið lögðum við af allar einkaskrifstofur og allt starfsfólk fór í opið vinnurými. Það er því auðvelt að nálgast mig með erindi en svo getur starfsfólk líka bókað tíma með mér í Outlook.

Það er líka nauðsynlegt að taka frá tíma til að geta unnið að verkefnum svo ég blokka yfirleitt nokkra hálfa daga í hverri viku til þess.“

Hvenær ferðu að sofa á kvöldin?

„Ég fer yfirleitt með bók ótengda vinnunni í rúmið um ellefuleytið en þá erum við hjónin aftur búin að fara í góðan göngutúr með Molann okkar.“

Kaffispjallið Landsvirkjun