Alma leiðir Samfylkinguna í Kraganum

Samúel Karl Ólason skrifar 26. október 2024 12:47

Alma Möller, landlæknir og oddviti Samfylkingarinnar í Kraganum. Vísir/einar

Alma Möller, landlæknir, mun leiða lista Samfylkingarinnar í Suðvesturkjördæmi. Guðmundur Ari Sigurjónsson, bæjarfulltrúi á Seltjarnarnesi er í öðru sæti og Þórunn Sveinbjarnardóttir, þingmaður, í því þriðja.

Listinn var samþykktur á fundi kjördæmaráðs í hádeginu í dag.

Guðmundur Árni Stefánsson, varaformaður Samfylkingarinnar og bæjarfulltrúi í Hafnarfirði er í heiðurssæti listans.

Í tilkynningu frá Samfylkingunni segir Alma að flokkurinn fari vel skipulagður og sameinaður inn í kosningabaráttuna.

„Ég þakka félögum mínum í flokknum fyrir traustið sem mér er sýnt og einnig hlýjar móttökur hér í kjördæminu. Það var virkilega góður andi á fundinum í Hafnarfirði í dag og kosningabaráttan hjá Samfylkingunni í Suðvesturkjördæmi er svo sannarlega hafin. Við förum vel skipulögð og sameinuð inn í kosningabaráttuna, auk þess sem við erum vel nestuð í gegnum útspil flokksins sem unnin voru í gegnum málefnavinnu um land allt, m.a. í samvinnu við almenning og fagfólk

Það er ákall um breytingar í íslenskum stjórnmálum, Samfylkingin er hið pólitíska afl sem getur brugðist við því ákalli og það hyggjumst við gera. Það er þörf á úrbótum hvert sem á er litið og hvort sem um ræðir efnahagsmál, húsnæðismál eða samgöngumál. Heilbrigðismálin eru svo, eins og gefur að skilja, mitt hjartans mál og þar er einnig svigrúm til að gera betur.

Ég hlakka til kosningabaráttunnar sem er fram undan, það er mikill meðbyr með Samfylkingunni og nú gildir að harma járnið meðan það er heitt. Það gerum við með því að snúa bökum saman og halda áfram að sýna þjóðinni að við séum í stakk búin til þess að leiða næstu ríkisstjórn undir forystu okkar frábæra formanns, Kristrúnar Frostadóttur.“

Framboðslisti Samfylkingarinnar í Suðvesturkjördæmi:

1. Alma Möller, landlæknir

2. Guðmundur Ari Sigurjónsson, bæjarfulltrúi á Seltjarnarnesi

3. Þórunn Sveinbjarnardóttir, þingmaður

4. Árni Rúnar Þorvaldsson, bæjarfulltrúi í Hafnarfirði og kennari

5. Jóna Þórey Pétursdóttir, lögmaður

6. Hildur Rós Guðbjargardóttir, umsjónarkennari

7. Ómar Ingþórsson, landslagsarkitekt

8. Margrét Hildur Guðmundsdóttir, deildarstjóri

9. Mirabela Aurelia Blaga, lögfræðingur

10. Baldur Ólafur Svarvarsson, arkitekt

11. Friðmey Jónsdóttir, sérfræðingur í æskulýðsmálum