Pönkast á breskri leikhúshefð

Það er frumsýning hjá Gísla Erni Garðarssyni í kvöld í konunglega Shakespeare-leikhúsinu í Bretlandi. Hann leikur í pönkútgáfu af óperunni Don Giovanni.

„Hérna eru menn vanir fimm tíma Shakespeare-sýningum þannig að það verður fróðlegt að sjá hvernig þeir bregðast við pönkútgáfu af óperunni Don Giovanni," segir Gísli Örn Garðarsson sem stígur ósmeykur á svið hins virta Royal Shakespeare leikhúss í smábænum Stratford-upon-Avon í kvöld þegar leikritið Don John verður frumsýnt.

Gísli leikur aðalhlutverkið en eiginkona hans, Nína Dögg Filippusdóttir fer einnig með stórt hlutverk í sýningunni. Boðið er til heljarinnar frumsýningarveislu og þar eiga gestir að mæta í fatnaði frá pönktímabilinu. Gísli var þó ekki viss um að allt fína fólkið myndi mæta í leðurjökkum með gaddaólar. „En það verður spennandi að sjá," segir Gísli.

Þótt bærinn Stratford-upon-Avon sé á stærð við Garðabæ þá er leikhúsið frægt og gestir þess frá London víla ekki fyrir sér að keyra klukkutíma til að geta notið sýninga þess. Leikhúsið var byggt í lok nítjándu aldar til heiðurs leikritaskáldinu og þar hafa ekki ómerkari menn en sir Laurence Olivier og Daniel Day Lewis stigið sín fyrstu skref. Gísli kveðst ekkert smeykur við breska gagnrýnendur þótt að þarna væri vissulega verið að brjóta blað í sögu leikhússins. „Það verður bara forvitnilegt að sjá hvernig þetta rótgróna leikhússamfélag bregst við."

Gísli og Nína verða úti yfir jólin ásamt dóttur sinni. Hann segir Breta ekkert sérstaklega mikið fyrir jólastemningu. „Nei, jólin eru aðallega bara fyllerí hjá þeim, það er bara verið auglýsa vodka og Baileys," segir Gísli.

Eins og Fréttablaðið hefur greint frá fer Gísli með stórt hlutverk í kvikmyndinni Prince of Persia sem framleidd er af Jerry Bruckheimer. Tökum á myndinni lauk fyrir viku síðan en Gísli útilokar ekki að kallað verði í hann aftur eftir áramót í frekari tökur í Marakkó. Aðspurður hvort hann hafi náð að blóðga einhverja Hollywood-stjörnu í þessari fokdýru bardagamynd vildi hann ekki meina það. Hann hefði aftur á móti slegið á putta Jake Gyllenhaall. Í bókstaflegri merkingu. „Við slógumst með sverðum og lömdum ítrekað á fingur hvors annars. Þegar maður sá þetta aftur á skjá vorum við hræddir um að hafa fingurbrotið hvorn annan," segir Gísli. [email protected]