Hansa í lögfræðidrama

„Já, já, ég mun styðjast við atriði úr mínu nánasta umhverfi. Ætli ég leiti ekki helst í smiðju systur minnar. Hún er meira svona í nútímanum," segir Jóhanna Vigdís Arnardóttir leikkona - sem betur er þekkt sem Hansa - og hlær.

Verið er að ganga frá ráðningum leikara í mikið réttardrama - Réttur - sem Saga film er að hefja á tökur fyrir Stöð 2, þáttaröð sem er í sex þáttum en þó þannig að hver þáttur er sjálfstæður. Leikstjóri er Sævar Guðmundsson en handrit skrifa þau Sigurjón Kjartansson, Margrét Örnólfsdóttir og Kristinn Þórðarson. Í aðalhlutverkum verða þau Hansa, Magnús Jónsson og Víkingur Kristjánsson sem mynda þriggja manna lögfræðiteymi. Hansa er komin af miklu lögfræðislekti. Faðir hennar er einhver þekktasti lögmaður landsins, Örn Clausen, móðir hennar er Guðrún Erlendsdóttir, fyrrverandi hæstaréttardómari, og systir hennar, Guðrún Sesselja, er lögfræðingur.

„Ég er aldrei beðin um að koma í prufur. Nema fyrir löngu í þetta. Og svo aftur um daginn. Var frekar vör um mig og spurði hvort þeir væru að djóka? Hvort þetta væri af því það eru svo margir lögfræðingar í kringum mig? Þá höfðu þeir ekki hugmynd um það," segir Hansa.

Sigurjón Kjartansson segir það ekkert öðruvísi en svo að Hansa hafi steinlegið. „Ekkert smá. Hún situr í þessum karakter. Það kom eiginlega ekkert annað til greina. Við prófuðum margar leikkonur en hún rúllaði þessu upp. Sem er hið besta mál."

Að sögn handritshöfundarins getur reynst flóknara að skrifa handrit að þáttaseríu þar sem hver þáttur er sjálfstæður. „Oft er tímafrekt að vinna með kannski tvær til þrjár sögur í hverjum þætti sem þurfa sitt upphaf, miðju og endi. En eitt sakamál er undirliggjandi í allri seríunni. Sem poppar stundum upp og hvílist þess á milli. Þetta er mikil stúdía."

Í upphafi nutu handritshöfundar hjálpar hins skelegga lögmanns Brynjars Níelssonar Og á seinni stigum kom Helgi Jóhannesson lögmaður að málum. „Sá ágæti lögmaður. Hann las yfir handritið, kom með punkta og ef eitthvað stóðst ekki þá breytti ég því. Það er mikilvægt að vera réttu megin við lögin í svona skrifum," segir Sigurjón. Tökur hefjast um miðjan nóvember og leikstjórinn Sævar er spenntur enda er þetta hans stærsta verkefni. Sævar leikstýrði Venna Páer og einni syrpu af Stelpunum. „Þetta er fín tilbreyting frá auglýsingunum sem ég hef verið að leikstýra árum saman. Þótt lögfræðidrama hafi verið vinsælt format í Ameríku hefur þetta ekki verið myndað hér áður en málin verða af íslenskum toga og má lofa drama og spennu í þessu."

Samkvæmt upplýsingum frá Stöð 2 stendur til að frumsýna þættina í janúar.

- [email protected]