Nicolas Cage fær loksins að leika Ofurmennið

Leikstjórinn Andy Muschietti greindi frá smáhlutverki Cage í viðtali við Miðausturlanda-útgáfu Esquire nýverið. 

Þar sagði leikstjórinn að þrátt fyrir að hlutverk Cage hafi verið smávægilegt þá hafi leikarinn sökkt sér í rulluna. Muschietti sagðist sjálfur hafa dreymt um það allt sitt líf að vinna með Cage og hann vonaðist til að vinna aftur með honum.

Þetta er ekki í fyrsta skiptið sem Cage leikur í ofurhetjumynd. Hann lék hinn óhuggulega Ghost Rider í tveimur myndum um andhetjuna, brá sér í hlutverk Big Daddy í myndinni Kick-Ass og kom fyrir sem svartklæddur Köngulóarmaður í Spider-Man: Into the Multiverse. Þá hefur hann einu sinni áður átt að leika Ofurmennið.

Forfallinn safnari og lesandi teiknimyndasagna

Nicolas Cage er forfallinn teiknimyndasögusafnari og átti um tíma eintak af einni verðmætustu teiknimyndasögu allra tíma, Action Comics nr. 1 frá 1938. Hún er sérstök fyrir þær sakir að hún var ein fyrsta teiknimyndasagan sem fjallaði um ofurhetju og kom Superman þar fyrir í fyrsta skipti. 

Vegna gífurlegra fjárhagsvandræða neyddist Cage hins vegar til að selja eintak sitt árið 2011 og fékk þá tvær milljónir Bandaríkjadala fyrir. Hann hefur viðurkennt það opinberlega að fjárhagsvandræðin hafi einnig haft mikil áhrif á hlutverkaval sitt undanfarin ár og peningar hafi verið úrslitaþátturinn í mörgum þeim rullum sem hann tók sér fyrir hendur.

Aðdáun Cage á ofurhetjum hefur líka haft bein áhrif á líf hans. Hann tók upp leiklistarnafnið Cage, í stað hins þekkta Coppola-nafns, vegna aðdáunar á Marvel-persónunni Luke Cage. Sonur Cage heitir jafnframt Kal-El í höfuðið á Ofurmenninu sjálfu.

Það var því draumur fyrir Cage þegar hann var ráðinn í hlutverk Ofurmennisins fyrir myndina Superman Lives árið 1998.

Ekkert varð af emo ofurmenni

Tim Burton sem var þá nýbúinn að leikstýra tveimur vinsælum myndum um leðurblökumanninn átti að leikstýra myndinni og Kevin Smith ætlaði að skrifa handritið.

Ofurmennið átti þar að vera talsvert frábrugðinn hinni hefðbundnu ímynd hetjunnar. Á myndum úr gamalli myndatöku má sjá Cage með sítt svart hár í gotneskum Burton-stíl. 

Hins vegar varð ekkert af myndinni og draumur Cage um að leika ofurhetjuna úti. Þar til núna í ár með myndinni The Flash.

Hún kemur í kvikmyndahús í sumar og fjallar um það hvernig hinn hraðskreiði Barry Allen splundrar alheiminum þegar hann ætlar að bjarga móður sinni með því að ferðast aftur í tímann. Eftir tímaferðalagið festist Allen í öðrum raunveruleika og þarf að fá hjálp frá öðrum ofurhetjum, þvert á víddir og tíma. Þar koma inn hinar öldnu ofurhetjur Cage og Keaton.