Heillar heims­byggðina með tón­listarperlum Qu­een

Íslendingar þekkja vel til Marc Martel en hann lék listir sínar fyrst hér á landi í tvígang fyrir troðfullri Eldborg í Hörpu árið 2015. Sjö árum síðar tróð hann upp í Laugardalshöll og í þetta sinn fá áhorfendur að njóta hans í mun meiri nálægð en tónleikarnir verða haldnir í Háskólabíói dagana 17. og 18. nóvember. Uppselt er á tónleikana 18. nóvember og því er betra að tryggja sér miða sem fyrst á auka tónleikana 17. nóvember.

Marc segist eiga mjög góðar minningar frá tónleikunum á Íslandi síðustu ár. „Það er alltaf svolítið súrrealískt að rölta um og skoða Reykjavík. Landslagið er ólíkt flestu sem ég hef séð annars staðar í heiminum. Nokkurs konar blanda af einhverju norrænu og tunglinu. Í næstu heimsókn okkar vonumst við þó til þess að geta ferðast eitthvað utan Reykjavíkur og skoðað meira af landsbyggðinni.“

Það eru ekki margar hljómsveitir eða listamenn sem eldast jafn vel og Queen og njóta í raun jafn mikillar hylli meðal ólíkra aldurhópa. Hvers vegna skyldi það vera?

„Ég hef einmitt oft hugsað um það,“ segir Marc. „Queen var með einstakan hljóm og meðlimirnir fjórir voru allir frábærir tónlistarmenn sem þó tóku sig ekki of alvarlega. Sveitin bjó líka svo vel að hafa ekki bara einn hæfileikaríkan lagahöfund heldur fjóra slíka. Svo var Freddie auðvitað einstakur söngvari með frábæra rödd og sviðsframkomu. Hann naut sín svo sannarlega best á sviði þar sem hann gat skemmt fólki.“

Marc og The Ultimate Queen Celebration voru að klára Þýskalands túr þar sem þeir spiluðu fyrir 75.000 manns á tæplega 28 tónleikum og munu því koma hingað sjóðandi heitir segir Franz Gunnarsson, framkvæmdastjóri Nordic Live Events sem sér um skipulag tónleikanna.

 „Það er reyndar mikill fengur að Marc er til í að spila í svona litlu tónleikarými þar sem vanalega er þessi Queen sýning leikin í 5000 sæta höllum. Þetta gefur íslenskum tónleikagestum einstakt tækifæri á að upplifa One Vision of Queen sýninguna í ótrúlegri nálægð. Umgjörðin verður samt hin sama í gæðum þegar kemur að sviðsetningu í hljóði og ljósum.“

„Hljómsveitin er svo hrikalega góð að ég myndi ekki vilja fara á svið á eftir þeim“ var haft eftir Roger Taylor, trommara Queen um bandið árið 2015.

Franz segir tónleikaferðina hafa gengið vonum framar og það megi svo sannarlega búast við að Marc og hljómsveitin verði í hörku formi í Háskólabíó. „Allir aðdáendur Freddie Mercury og Queen ættu alls ekki að láta þennan viðburð fram hjá sér fara og mæta í Háskólabíó til að hlýða á gömlu góðu Queen lögin. Það þarf ekki annað en að skoða lifandi flutning hans á netinu til að sjá hversu magnaður drengurinn er."

Queen sendi frá sér mikinn fjölda vinsælla laga á sínum tíma og mörg þeirra verða flutt á tónleikunum í næstu viku. Marc segir oft erfitt að setja saman dagskrána því bæði þarf að höfða til gallharðra Queen aðdáanda og hins hefðbundna tónlistargests. „Við höfum bætt við 4-5 lögum frá því við spiluðum síðast á Íslandi. Queen á svo mörg vinsæl en um leið ólík lög og það er alltaf skemmtileg áskorun að setja saman lagalista fyrir hverja tónleika. Við tökum líka tillit til óska tónleikagesta okkar sem biðja um óskalög á samfélagsmiðlum okkar eða bara í eigin persónu.“

Marc var einnig söngrödd Freddie í Óskarsverðlaunamyndinni Bohemian Rhapsody sem fjallar um sögu Queen. Hann hefur líka komið fram með Roger Taylor og Brian May, meðlimum Queen, og einnig með sinfóníuhljómsveitum sem flytja Queen lög. Það er því óhætt að segja að hann sé mjög hæfileikaríkur söngvari.

„Ég mætti á showið hans Marc Martel síðast þegar hann kom og mér leið eins og Freddie Mercury væri mættur í Laugardalshöllina! Rosaleg rödd á þessum meistara, bandið frábært, showið allt geggjað. Ég skemmti mér konunglega og gef þessu 5 stjörnur af 5 mögulegum."

Egill Einarsson (Gillz)

Auka tónleikarnir verða í Háskólabíói 17. nóvember og og fer miðasala fram á midix.is. Aðeins er selt í sæti og því um takmarkað miðaframboð að ræða.

Aldurstakmark er 18 ár og þurfa því börn undir 18 ára að vera í fylgd með fullorðnum. Húsið opnar kl. 19:00 og viðburður hefst kl. 20:00.

Nánari upplýsingar á midix.is.