Steingrímur aftur til starfa á þingi

Steingrímur J. Sigfússon, formaður Vinstrihreyfingarinnar - græns framboðs, sneri aftur til starfa á þingi í dag þegar þingið kom saman eftir viku páskafrí. Eins og kunnugt er slasaðist Steingrímur töluvert í bílslysi í Húnavatnssýslu um miðjan janúar þegar bíll hans valt í Bólstaðarhlíðarbrekku. Hann hlaut fjölmörg beinbrot og annað lungað í honum lagðist saman en hann hefur undanfarnar vikur verið í endurhæfingu og reynt að ná fyrri styrk. Forseti Alþingis bauð Steingrím sérstaklega velkominn við upphaf þingfundar í dag.